Abenduaren 29ko goiza hotz-hotza zen, eta seguruenik, batek baino gehiagok nahiagoko zukeen ohean geratu, baina —gripeak eragindako baja batzuk salbuespen— mundu guztiak konpromisoari eutsi eta, goizeko 8:30etarako, Euskal Herriko punta guztietatik hurbildutako gaztez beteta zegoen Espaloia Kafe Antzokia: Hamabi talde, guztira 75 bat lagun, hurbildu ziren Elgetara.

Bertoko lagunek harro-harro erakutsi ziguten eguna esnatzean han goitik duten ikuspegi ezin ederragoa. Lehiakideetako batzuek aitortu zigutenez, Elgetan bertan lo eginda zeuden, herriko ostatuetako batean, eta Ikus-entzunezkoen Rallyaren aitzakia aprobetxatu zuten asteburua bertan eman eta eskualdea ezagutzeko.

Ordutegia nahiko zorrotz jarraitu zen egun osoan: hala, goizeko bederatzietan, Topagunearen Gazte Saileko Teknikaria, Sonia Perez Anguera, Espaloiko agertokira igo eta bertaratutakoen arreta eskatu zuen. Arratsaldeko zazpietarako aurkeztu beharreko bideoetan erabili beharreko gaia eta ezaugarriak jakinarazteko momentua zen. Behean, parte hartzaileen artean, denetarik apur bat: aurreko edizioetatik ezagunak ziren batzuk, beste batzuk erabat berriak: telebistako aurpegi ezagunak, gazte koadrila animoso-animosoak, Araba aldetik guraso, ume eta guzti hurbildu zen familia oso bat ere egon zen lehiakideen artean. Sarrera osoa irakurri »

Kostata, baina epamahaiak bere lana egin eta sariak banatu ditu. Hauek izan dira hirugarren edizioko irabazleak:

1. saria (1.500 euro): TRASTAKA taldea (Gasteiz). ‘Bestaldean’

2. saria (1.200 euro): LOGUREA taldea (Eibar). ‘Hirugarren zenbakia
3. saria (900 euro): ERREKORTXOLIS (Zarautz). ‘El Par Geta’

Antolatzaileon izenean, mila esker guztioi parte hartzeagatik, eta zorionak irabazleei. Datorren urtean gehiago (eta hobeto) ezta?

Argazki gehiago hemen.

Aurreikusita zegoen bezala, arratsaldeko zazpietan amaitu zaie epea Ikus-entzunezkoen Rallyko partaideei beren lanak entregatzeko. Ezusteko tekniko txikiak gorabehera, puntual bukatu dute parte hartzaileek, eta lanak garaiz entregatu dituzte. Orain atseden hartzeko unea iritsi da. Tresneria jaso ondoren, askari txiki bat eskainiko diete antolatzaileek, egunean hara eta hona ibilita galdutako indarrak berreskuratzeko.

Denetariko jendea bildu da gaur Elgetan Rallyaren aitzakian: telebistako aurpegi ezagunak, gazte koadrila animoso-animosoak, Araba aldetik familia oso bat ere hurbildu zaigu, gurasoak, umeak eta guzti. Giroa polit-polita izan da egun osoan, Espaloia Kafe Antzokian bertan zein herri osoan: jendea mozorrotuta ibili da herrian gora eta behera, taldeetako batek manifestazioa eta guzti antolatu du… badirudi proposatutako gaiak, In-txortak, joko handia eman duela.

Orain, egunean egindako lanen segurtasun kopia egiten gabiltza. Amaitutakoan, 8:30ak aldera, lanen proiekzioari ekingo zaio. Epaimahaiko kideek, Jon Anduezak, Bea Narbaizak eta Haritz Rodriguezek, egileekin batera ikusiko dituzte bideoak, eta parterik zailena etorriko da, 1.500, 1.200 eta 900 euroko sariak banatzea, hain zuzen ere. Haien berri izan bezain pronto, jakinaraziko dizuegu.

Argazkiak ikusteko, egin klik hemen.